فعلا من عشق مجنون

بعد غياب أعود لوطن الأحباب

اسمحوا لي ، فلم انفض غبار الوقت عن قلمي بعد بالشكل المطلوب

فقط هي للتحيه وتجديد العهد والوعد

..............

وانا وحدي

وامي هالحياه أرضع صدرها هم

وليلي يم

وحزني في وسط قلبي ينادي كم

ويسألني .. متى ترجع؟

متى تسمع وتتكلم؟

وانا مستغشي ثيابي

ولا أسمع

ولا أرجع وأتكلم

وخوفي آه يا خوفي

عصا الجلاد وسيوفه

أماني غصنها يابس

جذرها والصخر مهده

أناديها وصوتي منكسر يرجع

وعصفور الأمل مقهور

ما جنـّح ولا يقدر

ولا عينه تناظر نور ..

مقهوره ...

مـ دام إن القفل بابه

ظلم بالحيل أحبابه

طويل الليل يا همي

ابي حضن الوفا يلمني

ابي ديره .. أبي مرسي

أبي محبوب ما ينسى

ولا يقسى

ولا يرحل ولا يبخل

انا الغرقان في حبه

وبُعده نار ما ترحم

أداري الريح بكفوفي

سلاسل .. قطـّعت جوفي

وابحر لجلها عينه

بلا ديره .. بلا ربان

شوقي والأمل شوفه

حياتي دون ذكره لي عذاب و هَم

أجر الصوت يا حادي

غريب مضيّع بلادي

أنادي .. من أنادي؟

يروح الصوت .. يرجع لي

سهم ويقطع كبادي

وانا صابر ولا قادر

أنا المفتون في عينه

وقلبي ما عشق غيره

ولا يرضى بديله حب

ويتغلى .. و يتدلل

وعني مول ما يسأل

ولا يرسل .. ولا يهتم

كأني ما عشقته يوم

أو ضوّت سماه نجوم

حبيته وداريته كما عيني

عن الحساد خبيته

عطيته كل ما يبغيه

بدّيته على نفسي

ولا أدري ... بعد هذا؟؟

أنا أحلم !؟ ... أنا أعلم !؟

يلوموني ولا يدرون عن حالي

يعذلوني .. يقولوا .. هالولد مجنون

ولا يدرون .. أو يدرون

إني في بحر الظنون

مركب يسحبه الساري

رياح البعد تلعبي

شراعي خان به الصاري

وهمي يمْ .. وخلفه يم

وليلي موج يغشى موج

ضايع في سراب الوقت

تايه .. في خطى التأويل

رحله والمدى غربه

وخوفي .. ما لها رجعه

ومتأمل أنا باكر

وأحلم والوعد باكر

وخايف ما يجي باكر

وأنا ناطر على بابه

تمرجحني حبال الوعد

ليل وسيل افكاري

وانا وحدي .. أمشط جذلة احزاني

واسقي شجرة الذكرى

دموعي نبع وجداني

فراشي شوك من تحتي

لحافي شوك من فوقي

أحاتيها .. أفكر دايم ٍ فيها

تصدقوا عاد؟

فعلا من عشق مجنون

.

..

...